Η μητρική γλώσσα των προγόνων μας από το Χαραμί Βαρτάν

πιλίτσ' ,το  = μικρό κοτόπουλο

τουρκική λέξη pilic = μικρό κοτόπουλο
φρ.Τα πιλίτσα, ντ' έσπαξα οψέ, ορθόν κρέας απάν' ατούν ' κ' είχαν, αμά το πιλάβ', ντ' εποίκα με το ζωμίν ατούν, πολλά τατλούν έντον.

πιρπιρίμ,' το  = γλιστρίδα

τουρκική λέξη pirpirim  = γλιστρίδα
φρ. Η παχτζά μ', μετά τα βρεχία, εγομώθεν πιρπιρίμα λέω Χρήστον, να σερεύ' ατά κ' ευτάω για τ' εμάς έναν σαλάταν με ξίδ' και σκόρδον και τα περισσα, ζατίμ,' σύρ' ατά 'ς σα κοσσάρας, ατά πα ψήν έχ'νε!

αγναμάης,  = αυτός που δεν καταλαβαίνει
τουρκική λέξη anlamaz   = δεν καταλαβαίνει, κάνει την πάπια

φρ. Η πονηρέσσα η Τογκάβα, ΄ς σ' ετοιμασίας, ντ' εποίνεμε για τα χαράντας, πάντα την αγναμάζαιναν εποίνεν για να γουρταρεύκεται, η οκναρού κ' φουτού΄τ, ας πολλά τα χουζμέτα και τα δουλείας.

καραμουτάσκουμαι  και καραμουτώνω = σκυθρωπιάζω. κατσουφιάζω

τουρκική λέξη kara +mut (= μαύρη τύχη) kara + umut, (= μαύρη ελπίδα) 

φρ. Σ' κού-σ' κού, γιάβρ'-ι-μ', στράταν έχ΄ς, γαρσού το Τσιτσιλήν εχονίεν, ο ουρανόν εκαραμούτωσεν κ' εκρέμασεν τ' ωτιά!, μη σκαλών ' η βρεχή κ' αργίεις 'ς σ δουλείαν 'ς.

πισλαεύω,* = βρομίζω ,λερώνω

τουρκική λέξη pisletmek   = βρομίζω ,λερώνω
φρ. Με το φορκάλ' ετσαρακάλευεν ατόν η πατσή ατ', όντες επισλάευεν τα σιλεμένα τα σκάλας με τα τσαμουρωμένα τα παπούτζα τ', αμά εείνος, γάσπαρα, ξαν' εσούμωνεν και....έτρωεν τα φορκαλέας.